鄰居：疑兇語無倫次 精神有異
【本報訊】「平日見到（疑兇）冇乜特別，嗰晚精神有問題、唔正常」疑兇涉嫌殺害女兒後在屋內劏屍，事後慌張先後兩次問人借電話，當晚借電話予疑兇的女鄰居，其丈夫林先生透露，他與妻子及兒子居於兇案劏房對面的單位，當晚其子到樓梯口倒垃圾，期間疑兇向其子借電話，聲稱「爆咗水喉要搵老公」，其子於是回家告知母親。其妻得悉事件後，見疑兇的劏房不斷有水流出，以為真有其事，於是好心借出手機，料不到追手機追出碎屍案。
稱致電「搵老公」 擾攘句鐘
林先生形容：「流出嚟啲水好正常，無血，所以老婆先信係爆水喉。」疑兇不斷撳電話，卻一直未能成功致電她聲稱的親友，擾攘近一個小時後仍未交還手機。林先生放工回家得悉事件，要求疑兇即時將電話歸還，「見佢係咁亂撳，又話要搵邊個，唔肯畀番（電話）我老婆，不斷話『等多幾分鐘』、『未得未得』。」詎料，疑兇突然走回家鎖門拒應門，最終他報警求助。
從未聞事主家傳嘈吵聲
林續指，疑兇搬入上址多年，形容「平日間中見到，冇乜點留意有特別」，又指從未曾見過疑兇的丈夫出現，但從未聞她「鬧女」及家中傳出嘈吵聲，但當晚疑兇行為反常，借電話時語無倫次，形容她「精神有問題、唔正常」。林先生又表示，其妻事後情緒不穩，猶有餘悸，不欲接受訪問。