一歲大B女予恩懷疑因為瑪麗醫院雙重出錯，手術後隨時慘變植物人，聞者傷心，聽者流淚，連日來全城集氣，送上祝福鼓勵，希望小予恩吉人天相，大步檻過。
一個精靈活潑、人見人愛嘅小女孩，就因為一次意外，餘生可能要喺病床度過，大好家庭從此蒙上陰影，嗰種淒涼實在不足為外人道。而最令人氣頂嘅係，出事之後，院方唔係第一時間檢討問責，而係企圖輕描淡寫，大事化小，強調只係護理人員「處理手法不理想」；醫管局高層尋日更加死撐，話據了解當時首先接觸予恩嘅護士同見習醫生，都係先檢查女嬰情況，包括目測女嬰呼吸同有冇郁動、觸摸女嬰以及檢查心跳等，只不過喺急救時未必能夠同家屬清楚解釋咁解啫。
咁即係點？即係打定預防針，前線人員跟足指引，潛台詞係事件「實屬不幸」；既然已經「未審先判」，當局煞有介事成立所謂「跨部門小組」，九成九又係一場敷衍公眾嘅爛騷。
講真，成單嘢疑點重重，特別係事發當日兒童深切治療部（PICU）明明有位，點解求其將病人送去兒科普通病房就算？仲有，據聞女童由出現呼吸困難迹象直至醫護人員急救，前後拖延達六分鐘，甚至有資深兒科醫生質疑，平日醫院演習同常規做法，都係先檢查病人情況再檢查儀器，到底係咪有人違反指引？上述疑問，醫療官僚有必要向公眾清晰交代。
話時話，瑪麗醫院近排醫療事故接二連三，爆完一鑊又一鑊。開漏藥搞到肝衰竭病人無喇喇要接受移植手術，最終枉死；病人喺手術室被開膛破肚等待器官移植，監督醫生半路中途竟然走咗去接私活，沒有最離譜，只有更離譜。正如有人話齋，瑪麗醫院係全港數一數二龍頭，資源人手相對充足，尚且搞成咁，難怪近年來公立醫院事故無奇不有，開錯刀、輸錯血、派錯藥，以至將病人身體當醫療廢物儲存室，如果苦主們上網發布#me too短片，講述慘痛經歷，相信十日十夜都播唔完。
公院事故鑊鑊新鮮鑊鑊甘，除咗因為醫管局肥上瘦下，前線十個煲得七個蓋，更重要係醫醫相護文化根深柢固。大家有眼見，病人家屬控訴醫療失誤，仲慘過《秋菊打官司》；而醫委會改革傾咗咁多年，進展有如蝸行龜步，講到底就係因為部分業界人士抵死抗拒。
國家領導人言者諄諄，告誡為官者「不忘初心，牢記使命」，其實行醫都係一樣，如果人人謹守入職誓詞「盡力維護人的生命，自從受胎時起」嘅精神，就唔會有咁多慘劇發生！