又流會喇！不過今次並非指立法會，而係深水埗區議會轄下嘅房屋事務委員會。話說該委員會尋日開會開到一半，就因不足法定人數而流會。民主派事後發稿批評建制派不顧民生，蓄意製造流會，矛頭直指有意參加立法會九龍西補選嘅民建聯議員鄭泳舜。但係建制派就反指民主派亦都有多名議員缺席，建制派亦並非刻意集體離場，無理由將流會責任推卸畀佢哋，質疑事件係選舉炒作，為民主派嘅九西補選參選人造勢。
根據民主派講法，當會議討論到白田邨重建編配問題時，多名建制派議員陸續退場，期間秘書處多次打電話催促都不夠議員開會，最後惟有流會。民主派質疑，當時有建制派議員身在會場附近，但故意冇返回會議室開會，置民生事務於不顧，講一套做一套。
建制派則有另一套說法，指當時民主派突然提出動議，就重建編配準則作出唔合理要求，部分建制派議員對建議有保留，但礙於在場嘅民主派議員多過建制派，動議點都夠票通過，佢哋只好選擇離場「費事阻住地球轉」。
建制派又反駁，流會前一刻總共有十二名議員在席，當中有四人係建制派，反映佢哋並非故意集體離場，反而如果民主派只要有多一人在席，就可避免流會同大比數通過動議，冇理由將流會責任賴晒建制派。