政情：葉劉撐查領展 叫唔郁容海恩
立法會修改《議事規則》拉鋸戰正進行得如火如荼，前日泛民話趁住呢個可能係最後嘅呈請書，分別要求成立專委會調查港珠澳大橋超支同領展拆售商場，而最近狙擊領展嘅新民黨葉劉淑儀就反高潮地企起身支持查領展，仲畀人見到佢猛揚手，但坐喺隔籬嘅黨友容海恩都唔企起身。葉劉尋日話自己「叫唔郁容海恩」，又話如果泛民早啲拉票，大家點會唔起身喎。
話泛民應早啲拉票
葉劉尋日就修改《議事規則》發言，講明支持建制派嘅修訂，仲用前日嘅呈請書做例子。佢話查領展呢啲咁大件事點會唔支持，又話「聽見我就好興奮」，對面有幾個年輕人係咁叫佢起身，但佢就叫唔郁容海恩，連公民黨譚文豪都問佢點解。佢仲即刻話依家呈請書嘅規例唔好，早一日入就得，如果泛民早啲拉票，大家點會唔起身呢？
佢又話頭先飲茶嗰陣，漁農界何俊賢問佢做乜唔叫佢起身？民建聯嘅陳恒鑌又話早知都會起身。佢好感嘆咁話，呢度邊個議員唔驚四年後會被炒魷？改完《議事規則》大家都要落力啲做嘢，將來呈請書係唔會因門檻高成絕響，大家係對事唔對黨嘅。