政情：DQ議員佔中搞手等錢使 騎劫元旦遊行鬥掠水

民陣認遊行主題冇焦點

民陣尋日召開記者會公布搞元旦遊行，將修改《議事規例》、廣深港高鐵香港段一地兩檢安排，以及《基本法》第二十三條立法等炒埋一碟，將遊行主題名為「守護香港」，事實係連民陣都自認無一個主題能夠成為焦點，所以佢哋亦拒絕預計參與人數，而佢哋向警方申請嘅不反對通知書，亦只係申報咗二千人出席，遠遠少於今年申報嘅五萬人。

既然睇淡遊行人數，民陣點解仲要勉強舉行呢？答案好大可能係遊行沿途嘅籌款站。尋日出席元旦遊行記者會嘅梁國雄、劉小麗同姚松炎，三人被DQ後現時被立法會秘書處追討擔任議員期間嘅全額薪津，每人分別涉款達二百七十五萬元至三百一十三萬元，咁多欠債下可能要破產，再加上姚松炎準備參加立法會九龍西補選，咁就更加等錢使，當然唔會放過遊行籌款嘅機會。

同樣等錢使嘅，仲有立法會社福界議員邵家臻，事關明年初包括佢在內嘅九名違法佔領搞手，將就案件進入司法程序，屆時官司費肯定不菲，而專登為呢班佔中搞手成立籌訴訟費嘅「守護公義基金」，多次騎劫遊行上街掠水，食髓知味，喺嚟緊嘅元旦遊行自必然照辦煮碗。

唔單止咁，早前成立咗個基金為被判囚嘅「雙學三子」香港眾志秘書長黃之鋒、主席羅冠聰同學聯前秘書長周永康，同埋高鐵撥款衝擊立法會嘅十三名社運人士籌「安家費」，相信亦都會趁元旦遊行上街籌款，難怪官司纏身嘅黃之鋒亦專登去記者會露一露面喇！