中環出更：季霆剛狙擊郭家麒議員資格
香港第十三屆全國人大代表選舉會議主席團前日確認四十九名候選人名單，而早前表明唔會簽署聲明嘅立法會議員郭家麒就被取消資格（DQ）。其中獲確認成為人大候選人嘅季霆剛，尋日就話郭家麒唔肯簽聲明係違反誓詞，佢依家正考慮入稟高院要求DQ郭家麒嘅議員資格。
斥無視基本法 考慮入稟
季霆剛話按中國憲法第三十一條就列明國家係必要時得設立特別行政區，而《基本法》序言亦列明根據中華人民共和國憲法，全國人民代表大會特制定中華人民共和國香港特別行政區《基本法》，所以郭家麒參選人大唔肯簽署擁護憲法嘅聲明，即係代表佢無視《基本法》，嚴重違反誓詞，佢正就入稟與港研會同其他律師商討進一步行動。
人大選舉主席團共DQ十個人嘅參選資格，不能成為候選人，除咗郭家麒之外，仲包括已解散嘅香港民進黨主席楊繼昌、傘後組織「鳩嗚團」七名成員等。
卓妮