中環出更：流感傷「心」 鄭淇德：疫苗好重要
流行性感冒嘅殺傷力真係可大可小。香港醫療專業人士協會副主席鄭淇德早前患上流感，久治未愈，流感病毒仲感染心臟，引發心肌炎令到心臟功能大幅下降，但喺一眾醫生朋友嘅悉心診治之下終告康復，仲龍精虎猛咁出席醫專會九周年會慶。
卓妮早前喺會慶見到鄭淇德，佢話初患流感時以為食下藥就會好番，點知拖咗好耐都未見起色，行步路都覺得氣促，照肺後先發現心臟肌肉遭流感病毒破壞，導致心臟只剩三成功能，要留醫治療一個月先至康復。佢形容今次病情真係好危險，但幸好一眾醫生朋友好幫得手，既有人同佢諗擊退病魔嘅方法，亦有人日日去醫院探病為佢打氣。
鄭淇德話感謝東區醫院心臟科醫生嘅照顧之外，又話香港嘅醫療水準雖然好高，但今年已有幾百人因流感而身故，所以接種流感疫苗真係好重要。佢老友、醫專會創會主席江明熙就話鄭淇德仲有好多公益服務要做，所以大家都要想辦法令佢盡快康復。
江明熙指A.I.難取代醫生
對於人工智能（A.I.）有冇機會取代醫生嘅工作呢？江明熙就話可能性甚微，因為人工智能縱使懂得收集生理數據去分析病情，但係醫生嘅經驗同直覺，科技就難以取代，況且醫生打針施藥，好多時都涉及風險嘅判斷，又要考慮埋病人嘅情緒同心理變化，一個稱職嘅醫生除咗講醫術，仲要有一顆仁心至得，而冇情感嘅機器，恐怕好難做得到 。
講起用心，梁世民雖然卸任牙醫學會會長嘅職務，但佢仍然好關心社會服務。佢留意到弱智人士自我照顧能力弱，以致口腔問題好嚴重，但懂得為弱智人士診治嘅牙醫卻又非常缺乏，所以佢正構思一個培訓牙醫為弱智人士口腔診療嘅計劃，初步先由非政府組織開始，期望本港數以萬計嘅弱智人士都可以免受口腔疾病之苦咁話。
卓妮