職場健康:操作機械先了解安全措施

黃經理每朝主持早會,為所有同事簡介工作及職安健注意事項。「今日為第一座園景區修剪花草!小方第一日返工,就跟小圓熟悉吓工作啦!」

「放心啦!我哋轉頭執埋部剪草機同鏈鋸就開工啦!」小圓說。

接受有關訓練 配防護裝備

黃經理問︰「等我考考你關於操作機械的安全措施先!剪草機及鏈鋸有鋒利刀片同旋轉部分,如果唔小心可導致同事嚴重受傷,咁我哋應該點做呢?」

小圓答︰「我知!開工前圍起操作機械的地方,避免住客停留或進入。注意避開石塊及雜物等硬物,因可能被機器吸入、揚起或飛濺而擊傷員工;加件啱身的工作服同使用有標準的護面罩、耳罩、安全鞋同防割手套就冇有怕啦!萬一有異物卡住機器入面,一定要等機器完全停機同截斷電源先打開護罩清理。」

「醒目!咁下一題我考吓新同事先!小方,除咗轉動部分之外,仲有冇咩安全同健康嘅風險呢?」黃經理問小方。

小方答︰「有呀!機器由電力或燃油推動,要注意觸電同火警危險。所有電動工具都必須接駁地線或者雙重絕緣,加埋手提水氣掣就萬無一失。落雨同天氣潮濕要避免使用電動機械。當然啦,所有操作機械的同事都必須先接受有關訓練,了解操作特性及安全措施先可以使用,換句話說,圓哥你就唔好掂我把鋸啦!」

「咦,小方好叻喎!」

「梗係啦!我喺職安局上咗安全使用鏈鋸課程嘛!有聽書o架!」

職業安全健康局

www.oshc.org.hk

第一手消息請下載on.cc東網iPhone/iPad/Android/Windows Phone Apps