政情：中大候任校長 獲頒美國發明家學會院士
要提升生活質素唔一定係靠物質享受，最重要係身體健康，咁樣好大程度係受惠於醫療水平提升，醫學創新尤為重要。一直專注研究肌肉骨骼生物同組織再生嘅中大候任校長段崇智，獲選為美國發明家學會院士，表揚佢積極創新嘅精神，同肯定佢多項傑出發明對提升人類生活質素，促進經濟發展同社會福祉嘅貢獻。
最高榮譽讚揚醫學成就
美國發明家學會係非牟利會員組織，而院士資格係學術發明家嘅最高專業榮譽，過往得獎人包括二十九名諾貝爾得主。學會主席Paul R.Sanberg公布院士名單時，讚揚段崇智喺骨骼組織工程再生醫學成就卓著，其研究成果對於理解同解決肌肉骨骼醫學方面當前迫切嘅臨床問題帶來重要貢獻，而近期佢用微型生物反應器平台複製人類關節，成功製造名為「微關節」嘅三維關節，備受稱許，微關節更將會用研究同測試治療關節炎疾病嘅藥物。
段崇智對獲得院士資格感到好榮幸，期望憑住自己嘅經驗同成就可推進香港創新科技發展，同時培育新一代的發明家，帶領中大研究精益求精。