政情：民主派鬼打鬼 初選寸爆盟友

話說佢哋三個尋日出席電台節目，被問到假如必須要支持兩名對手中嘅其中一位時，年紀最輕嘅張秀賢就話會揀范國威，原因係對方做咗十八年區議員，「細細個就聽過佢（范國威）個名」。嗱，咪以為佢係真心讚賞對方，因為佢下一句即刻寸爆話：「關愛座都讓啲老嘅先啦！」暗示范咁老仲同後生爭位。

電台節目互翻舊帳

范國威被人咁寸，梗係唔多忿氣，話會祝福番張秀賢，但翻舊帳指對方「雖然年幾前講過唔會參選，但今年年頭又改變咗主意」，暗寸張反口覆舌。范又指民主派嘅初選機制討論咗整整十個月，但郭永健「臨尾先彈出嚟」，又話自己認真準備選舉，希望對手都係，影射郭永健準備不足。

至於無對手祝福嘅郭永健，就話范國威睇住個議席都睇咗好耐，所以佢會選擇支持張秀賢，因為對方「唔似話係為個位出嚟（選）」，明寸欲重返立法會嘅范國威。