大家都聽過「書中自有黃金屋，書中自有顏如玉」，但大家可能唔知，呢句嘢原來係出自宋真宗嘅《勸學文》，意思即係士子只要埋頭苦讀，乖乖哋唔好搞事，榮華富貴唔係問題。可惜今時唔同往日，香港地早就冇「讀大學出人頭地」呢支歌仔唱，唔怪得愈來愈多年輕人離心離德，「港獨」愈來愈有市場喇！
呢嗱，港府啱啱公布舊年本港貧窮情況，結果發現貧窮人口達一百三十幾萬人，平均每五個市民就有一個窮人；而最攞命嘅係，擁有大專或以上學歷嘅在職貧窮人口，由一二年嘅一萬八千幾上升到舊年嘅二萬八千幾，當中又有一萬七千人有大學學位，人數較一二年增加近八成，都咪話唔誇張。
即係咁，高學歷貧窮已經唔係今時今日嘅事，亦唔係香港獨有。早排美國有單新聞，大學為縮減成本，近年紛紛改聘兼職教員，由於薪水太奀，部分人搞到要賣淫幫補生計，香港嘅大學生當然未去到咁慘情，但畢業後五、六年仲係搵得萬零二萬蚊者，大有人在，呢班後生仔莫講話喺社會上上位無望，連搬出去自立門戶都無能為力。你知喇，長期缺乏私人居住空間，好容易出現暴力傾向，咁多年輕人走上街頭，郁下就「勇武抗爭」，與此不無關係。
大家不妨睇番上一代年輕人，讀完大學出嚟，只要肯捱肯拚搏，唔愁冇得升職加薪。當然喇，如果好似今日咁，十幾年不吃不喝都未必買得起個豆腐膶蝸居，咁就講乜都嘥氣。有頭髮冇人想做瘌痢，個個安居樂業，仔細老婆嫩，就算有心人點樣挑撥都好，都冇人會咁蠢拋個身出嚟搞事，唔單止唔會搞事，仲會瞓身幫手維持原狀添！
如果話「貧窮」係社會不安定嘅最大因素，高學歷人士嘅「相對貧窮感」更加係計時炸彈。佢哋一心諗住讀完書出嚟前途一片光明，點知希望愈大，失望愈大，嗰種落差好容易化為對社會嘅怨氣。要解決呢個問題，官老爺第一個責無旁貸，本港經濟結構單調，唔係金融就係炒賣，就算有人才都無用武之地，港府成日話要做大做闊經濟大餅，究竟做過啲乜？
當然喇，年輕人最重要都係盡番自己責任，讀好啲書裝備自己。有辦你睇，台灣大學生喺搞政治方面同香港十足十難兄難弟，結果畢業生人工長期陷入「22K魔咒」；反觀新加坡大學生，你可以話佢哋對社會漠不關心甚至犬儒，但人哋起薪點挨近兩萬港元，就係高過港台學生一大截，唔到你唔服。
正所謂禍福無門，唯人自招，幸福唔會從天而降，年輕人一味埋怨生不逢時，始終唔係辦法！