政情：林健鋒着粉紅褲開會「一舉兩得」
立法會「拉布」成風，其中財務委員會議程塞車情況最嚴重，不時要喺星期六加開會議處理。通常周末返工，唔少議員都選擇Casual Wear，但尋日見到商界議員林健鋒（Jeffrey）真係嚇一嚇，竟然着咗條粉紅色褲！農曆大年初一就話紅色衣着好意頭啫，不過尋日只係十月初一，有排都未到新年，莫非Jeffrey想着條紅褲邪一邪民主派？
自己着得輕鬆 人哋又開心
Jeffrey笑笑口話，平日嘅西裝形象太嚴肅，所以假期要平衡一下，又話經常着住條粉紅色褲去打高爾夫球，貪喺綠色草地嘅球場夠晒突出。佢又話個人着得輕鬆，更加可以令身邊嘅人開心，可以一舉兩得喎。
民主派為咗拖延大會審議修改議事規則，前日率先喺內務委員會討論修訂議事規則時展開拉布，其中人民力量陳志全（慢必）更企圖阻撓議事規則委員會主席謝偉俊宣讀報告，雙方發生肢體衝突，慢必仲話被謝批(月爭)添。Jeffrey尋日着條粉紅色褲去開財會咁突出，唔知會否分散咗慢必拉布嘅注意力呢？