政情：「進跟」食水黑點 許智峯橫額蝦碌
民主黨（白鴿黨）一直有跟進公屋食水含鉛問題，尋日就有讀者發現，該黨立法會議員許智峯（峯鴿）同社區主任蘇逸恒齊齊喺街掛咗橫額，關注食水安全問題，之但係佢哋嘅橫額就貼上「進跟食水黑點問題」，將「跟」同「進」兩個字掉轉咗嚟貼，唔知係粗心大意定係另有意思呢？
兩個字掉轉嚟貼
早前該黨收到筲箕灣愛東邨居民求助，話啲食水出現黑點同啡黃色，擔心唔知係咪瀝青，該黨就要求房屋署同水務署跟進，相信橫額都係同事件有關。峯鴿尋日就話，其實佢都唔知自己掛咗張咁樣嘅橫額，估計係助理幫手掛嘅。
睇真啲張橫額，喺「進跟食水黑點問題」黃色大字下面，應該係一張黑色底嘅橫額，隱約仲見到有中文字添，相信係將橫額循環再用。雖然環保都係好事，不過再用時都係要小心啲喇！