政情：屢阻立法 梁家傑扮失憶講風涼話

認「花崗岩腦」 打倒昨日的我

中聯辦法律部長王振民前日話，有啲香港人拒絕接受香港回歸嘅事實，長期攻擊中央政府同中國共產黨，係「花崗岩頭腦」。梁家傑喺電台訪問中，就直認自己係「花崗岩頭腦」嘅一員。但其實梁家傑除咗抗中反共，仲可能患有嚴重失憶症。

點解咁講呢？首先梁家傑話，港府曾經喺○三年推動廿三條立法，但錯失咗最好嘅立法時機，因之後十多年發生嘅銅鑼灣書店事件、高鐵一地兩檢爭拗等，令港人難以對中央有信心，講到好似佢當年係大力支持廿三條立法咁。

事實上梁家傑係當年嘅「廿三條關注組」嘅核心成員，與其他多位前大律師公會主席同民主派成員瞓身反對廿三條。佢哋嘅其中一個主要理據，就係香港當年啱啱經歷完沙士慘劇同經濟衰退，唔係適當嘅立法時機。依家佢又話當年先係最好嘅立法時機，唔單止係打倒昨日的我咁簡單，直情係當全香港七百萬市民都失憶。

反普選方案 改口談惡果

梁家傑又話，除咗廿三條立法，《基本法》第四十五條有關特首普選嘅條文亦同樣未落實，惡果有目共睹。其實中港政府已於一四年提出落實二○一七年特首一人一票普選嘅方案，並承諾可於特首普選落實後開始討論立法會全面普選。然而民主派拒絕收貨，聲稱中央提出嘅唔係真普選，並發動違法佔領行動企圖迫使中央讓步。

結果特首普選方案喺民主派反對下喺立法會遭到否決，雙普選夢想成空，並間接引發之後嘅港獨思潮、旺角暴亂等連串惡果，要全港市民埋單，最諷刺係一班違法佔領搞手承認罪責等坐監，但律政司司長袁國強就等運到，三年都唔提出檢控，令司法制度名存實亡。當年身兼「四十五條關注組」核心成員、並有份投票否決特首普選方案嘅梁家傑，莫非又全無責任？