中環出更：努力被忽視 嚴子杰自稱「負二代」
含住金鎖匙出世嘅「富二代」令人羨慕，不過啱啱出爐嘅「香港青年工業家獎」得主之一、香港電子業商會榮譽副會長嚴玉麟大仔嚴子杰（Jacky）就百般滋味在心頭。事關佢去年角逐青年工業家失敗，因為有啲人當咗佢係「富二代」，Jacky呻話埋沒咗佢嘅努力，其實佢呢盤LED燈生意係自己由零開始創辦嘅，感嘆父蔭係負債，自己係「負二代」就真。
Jacky話，去年角逐失利後原本已經心灰意冷，今屆都冇打算再報名，好彩獲好友工業總會青年委員會前主席劉燊濤鼓勵，佢先至再次報名。佢今次就仔細介紹自己所作嘅努力，終於得到他人肯定。嚴玉麟對個仔闖出一片天梗係好滿意，佢笑笑口話，自己只係喺生意網絡上幫吓手，連資金都冇乜點支持，因為做呢行資金需求唔係好大。
葉傑全笑言愈忙愈精神
同獲得青年工業家獎嘅仲有香港表廠商會會董周宛賢（Amy），工總副主席葉中賢嘅爸爸葉傑全就奪得傑出工業家獎。Amy嘅爸爸周錦光、妹妹周幸儀及細佬周子良都拉隊去打氣。周錦光係三十年前第一屆青年工業家，見佢仲係好後生，佢笑稱秘訣就係日日做十五、六小時，所以鼓勵後生仔入行做工業喎！
做電器起家嘅葉傑全今年已八十歲，佢都保養得宜，睇唔出咁高齡。葉傑全就話，自己祖籍浙江寧波，寧波人特色係愈忙愈精神喎。依家佢盤生意已交畀個仔做，自己就趁仲精神做吓義工，為社會做啲嘢，佢仲勉勵其他工業家都要回饋社會咁話。
卓妮