之前有個油站廣告，宣傳口號係「因為我哋都係揸車嘅囉」。唔知係咪因為高官自己唔揸車，出入有司機接載，居然以為狂加牛肉乾罰款可以解決違例泊車問題，想唔認閉門造車都唔得！
香港地違泊問題有幾嚴重，相信唔使功夫茶多講。當局原本計劃明年起將交通違例定額罰款金額，大幅增加百分之五十，即係由現時嘅三百二十元同四百五十元，分別調高至四百八十元同六百八十元，後尾因為業界以至市民反對聲音太大，當局將加幅減半，點知一樣過唔到民意嗰關。立法會通過動議，暫時擱置調整違泊牛肉乾罰則，直至政府解決泊車位供不應求問題為止，而政府亦終於知衰，接納有關建議。
其實只要官老爺稍為代入駕駛人士嘅處境諗諗，就知一味狂加罰款根本無補於事。泊車位一位難求，特別係搵食車司機，一係唔撈轉行嘅啫，否則搵唔到位泊車，都要焗住博一博。警方今年上半年發出八十多萬張違泊牛肉乾，比去年同期增加一成半，足以證明一味加強執法，只係治標唔治本。
鬼咩，近年嚟本港泊車位數量買少見少，新落成建築物車位比例降低唔在講，當局收番唔少市區露天停車場，又拍賣位於旺區嘅政府停車場，咁搞法，唔爭崩頭至奇。有數得計，過往十年私家車增長近五成，而泊車位增加不足一成。家陣唔單止樓價高處未算高，連車位都炒到熱火朝天，原因咪就係供不應求囉。
本來呢，鼓勵市民使用公共交通工具，既紓緩塞車情況又有利環保，不失為一個方向，問題係港府由得車輛數量高速增長嘅同時，泊車位同新增道路又慢如蝸牛，違例泊車都係迫於無奈嘅啫。最好笑嘅係，早排運房局局長陳帆仲公開叫年輕人買唔到樓可以買車，話可以等「靈魂從軀體中出嚟游走一下」喎，你話係咪何不食肉糜兼鼓勵違泊吖！
講到底，要解決違泊問題，歸根究柢都係增加泊車位供應。有人建議利用現代科技，透過電腦系統、機械臂等設備增加停車場泊位數目，呢樣嘢韓國、日本已經流行咗好耐，唔係話冇得諗，問題只係港產官僚學唔學得嚟啫。第樣唔使講，港府幾年前聲稱要將九龍東打造成「智慧城市」，其中一個項目就係利用手機App，向司機提供區內停車場空置車位數目，結果搞咗幾年，都係得兩成停車場參與，簡直嘥氣！
針唔拮到肉唔知痛，官老爺走出冷氣辦公室，自己揸車體驗吓搵位泊車之苦，制訂政策就唔會咁離地嘅嘞。