政情：陸志聰生日無休 緊守年齡秘密
身兼港島西醫院聯網總監嘅瑪麗醫院行政總監陸志聰，尋日生日亦照常開工，一眾瑪麗醫院嘅肺移植病友特意準備蛋糕送上驚喜生日會。最窩心嘅係蛋糕刻意冇寫數字，避免當眾揭穿佢嘅年齡秘密。陸醫生亦借意故弄玄虛，笑笑口話自己同譚詠麟同年，莫非想話自己年年二十五歲？
陸醫生話相比青春常駐同保持年輕等生日願望，更希望病人可以早日進行移植，最開心見到病友重獲新生、精精靈靈。積極推動器官移植嘅陸醫生向來受器官移植病友歡迎，今個月初佢同病友一齊參加慈善跑比賽，由一名醫生孖住一位病友，好「friend底」。
人所皆知佢同有「怪醫」之稱嘅立法會醫學界前議員梁家騮都係第一屆中大醫科畢業生，今年幾多歲大家有數得計喇！