政情：未來冇人知 陳繁昌籲揀神科不如按己所長
好多人都以為，能夠入讀大學某啲「神科」例如醫科，就係將來飯碗嘅保證，但科大校長陳繁昌尋日喺一個講座分享學習經歷時自爆，當年獲港大醫科取錄，但佢竟然唔讀，反而去美國讀物理。佢仲話未來世界渴求邊一方面嘅人才，冇人可以預知，反正大家都冇水晶球，倒不如按自己所長嚟選擇學科。
自爆曾被港大醫科取錄
陳繁昌憶述自己中學時代，數學成績一枝獨秀，並且獲得美國一所以物理研究見長嘅大學取錄，跟住佢自爆當年亦都曾投考港大醫科並獲得取錄，但好彩父母並冇要求佢一定要讀「神科」，於是佢就選擇咗去美國讀物理，否則佢嘅發展道路就會同今日好唔同喇！
講到選科，佢話讀大學嘅最終目的，其實係認識自己，而佢因自知有不足之處，所以由最初修讀物理轉到工程學，之後又轉而攻讀電腦，而電腦出身嘅佢後來得到加州大學邀請擔任數學系系主任，對方嘅理由係睇中佢有嘅學問，而唔在乎佢有冇數學文憑，所以一個人嘅事業同選讀邊一門學科並冇必然關係。
佢又話今日炙手可熱嘅人工智能同大數據嘅專才，好多都係來自數學同物理學，而今日世上十大創新企業，其掌舵人無一來自「神科」，所以與其為出路而選擇「神科」，不如嘗試文理兼備嘅跨學科教育，可能更符合未來世界嘅需要。