政情：屢爆醜聞兼內訌工黨遭唾棄

香港大學民意研究計劃喺今個月十六日至十九日就「十大政治團體」訪問咗大約一千名市民，結果顯示榜內無論建制派定泛民政黨嘅支持度均有上升，唯獨工黨榜上無名，係近兩年嚟首次跌出十大政治團體榜外。呢個調查係分兩個階段進行，工黨喺首階段嘅認知率低而被剔除上榜。工黨認知率急瀉，其實同黨內屢爆醜聞，以及淪為一人政黨不無關係。

李卓人早年收漢奸黎秘捐

李卓人喺一四年被揭發收取漢奸黎秘密捐款五十萬元，竟然「袋住先」足足九個月，之後只係將本金還番畀工黨，期間嘅利息就袋袋平安，結果引嚟猛烈批評。而喺舊年違法佔領行動發起人、港大法律系副教授戴耀廷發起嘅雷動計劃，呼籲市民配票畀部分邊緣泛民候選人，結果醜聞纏身嘅李卓人同何秀蘭分別喺新界西同港島區直選落敗，李卓人事後亦批評雷動計劃「有不足之處」，暗示計劃係令佢冇咗議席嘅罪魁禍首。選舉失利，工黨由上屆立法會坐擁三席，到今屆剩番一席，喺議會更加無力。

對外議席不保，黨內又爆內訌。早前傳出何秀蘭同時任主席胡穗珊不和，胡穗珊更直指何秀蘭處事不公，喺「哀莫大於心死」下決定退黨抗議，而外界一致認為，失去年僅三十六歲嘅胡穗珊，係工黨年輕化步伐上嘅一次重挫。

工黨喺議會嘅政治能量大幅下降，冇乜作為，而黨內又立立亂，再加上跌出十大政治團體榜外，睇嚟都好難止跌回升。