中環出更：張國鈞因「流」得福 陪到老婆慶生
新一個立法年度開波冇耐，上周四就發生首次立法會大會流會，建制泛民互指係對方責任，喺眾人劍拔弩張之際，民建聯嘅張國鈞（Horace）就因禍得福，趕得切陪老婆切生日蛋糕。
為咗畀老婆生日驚喜，Horace搵嚟老婆嘅一班閨密夾計，搞咗個神秘派對。不過，派對當日咁啱撞正民主派拉布，對方不斷點人數浪費時間，佢只能夠眼白白坐喺度，眼見派對就快要開始，知道佢趕時間嘅自由黨黨魁鍾國斌（Felix）即刻對佢拍心口，話佢會叫啲黨友坐定定，叫Horace有事可以走先，Horace事後亦大讚Felix夠義氣。結果會議喺下晝因法定人數不足而流會，Horace就因禍得福，可以趕得切去派對陪老婆慶生。
忙到畀囡囡詐型：唔知爸爸搞乜
氹得掂老婆，但係Horace就氹唔掂兩位囡囡嘞！身兼中西區區議員嘅Horace加入新一屆行政會議後，成為「三料議員」，忙嘅程度都三級跳，所以囡囡唔多見到爸爸喺電視上出現，喺屋企又無影，結果佢哋向Horace抱怨，齊齊話「都唔知爸爸你搞乜」，令到Horace哭笑不得。
卓妮