中環出更：荳品廠重開高永文狂食煎釀豆腐
有多年歷史、曾入選米芝蓮街頭小食、喺深水埗北河街嘅公和荳品廠，曾被多次票控無牌食肆罪，最近取得食肆牌照，原址重新開業並喺尋日舉行開幕禮，食物及衞生局前局長高永文都有出席，話好開心終於食番心愛嘅煎釀豆腐，而深水埗區議會副主席陳偉明就透露，區議會正初步構思與唔同機構合作搞本地遊，其中一個正考慮嘅景點就係呢間舖頭。
高永文話自己擔任局長嘅時候，因為知道呢間舖頭未取得食肆牌照，所以唔敢嚟食嘢，亦唔敢過問進展，以免被指干預，惟有私下拜託當時嘅政治助理陳凱欣向當區區議員鄭泳舜（Vincent）了解進展，好開心呢間舖可以攞到牌照，以後自己可以堂堂正正入嚟食嘢，日後大家可能會喺呢間舖撞到佢。佢仲當場加辣椒醬食咗一大堆煎釀豆腐同豆腐花等，期間一度顧住食，話自己唔得閒講嘢添！
Vincent就話協助呢間舖頭攞食肆牌嘅時候都面對唔少困難，消防等事項都要符合牌照要求，而其中一大困難就係電力問題，需要同電力公司商討先可以解決，裝修期間仲試過被偷去冷氣機。
店外招牌捐咗畀歷史博物館
該舖頭嘅第五代負責人蘇意霞話花咗約一百五十萬元裝修，店外嘅招牌已經捐咗畀香港歷史博物館，而為咗保存店內嘅招牌，裝修嘅時候都有特別加固。
至於新生精神康復會行政總裁游秀慧亦有到賀，佢話機構為康復者設荳品廠，剛開始都唔識點樣先做得好，後來搵咗呢間舖頭教路，對方都好樂意去教一班康復者，到依家有部分康復者仲因此唔需要攞綜援。
卓妮