制服襲休班警疑兇 驚足十分鐘 勇鄰居：「佢郁我會批（月爭）還手」
「如果佢真係郁我，我會批（月爭）還手，好彩佢好定，情緒冷靜番落嚟」，在葵涌安蔭邨恐怖傷人案中，撳實疑犯十分鐘勇救休班警的鄭先生，憶述經過時猶有餘悸。他指最恐怖莫過於沒有人幫手，「我都驚，啲鄰里咁樣，我揸實佢，如果唔係我個女報警，我死咗乜都冇」。雖然境況兇險，幸好疑兇「企定定」無反抗，被到場警員拘捕。對於鄭的見義勇行，警方考慮頒發好市民獎給鄭氏父女。
讀過保安課程的鄭先生表示，事發時正在家中看電視，突聞屋外傳來咆哮和救命聲，即時衝出屋外察看，根據南亞街坊指示走到樓梯，見到疑兇揸刀站於梯間，初時以為他搶劫及襲擊女人，看清楚才知是男人被刺傷倒地。鄭即刻大叫「你咪郁呀」，疑犯當時好鎮定，鄭遂質問他「點解嚴重到要用刀」，惟疑犯只應了一句「你都知咩嘢事」，但始終沒有講原因。鄭用雙手緊捉疑兇左手，「捉住佢十分鐘，唔敢叫人報警，驚刺激到佢反抗」，在捉住疑兇期間，鄭非常緊張，猶如過了一個小時，直至警員持盾牌到場拘捕疑兇，他才鬆一口氣。
鄭先生又稱，當時不知姓吳傷者是警察，見吳好淡定，並說「我頸傷咗，係咪流好多血，同我報警，我713嘅」。鄭才醒覺傷者是鄰居吳太的兒子，遂安慰他「好快有人嚟救你」，並叫他不要動，否則流血會更多。鄭在捉實疑犯手期間，都想過對方反抗，「如果佢真係郁我，我會批（月爭）還手」。不過，鄭亦擔心若批（月爭）還手，疑兇會被打跌，倒地時可能砸中傷者，令其傷上加傷。幸好，疑兇只是冷靜地站在現場，鄭女報警後，警員速到場將疑兇拘捕。
警擬頒好市民獎予父女
被問到日後再遇上同類事件，會否再冒險幫手撳住兇徒，鄭表示「咁要睇吓點先啦」。由於鄭的英勇行為，阻止了疑兇可能進一步傷害事主，加上其女兒協助報警，警方將考慮頒發好市民獎給兩父女。