「伊斯蘭國」（IS）最近兵敗如山倒，甚至連「首都」都保唔住，睇怕離摺埋之日不遠；而喺千里之外嘅香港，本地「恐怖組織」南亞兵團卻係方興未艾，打家劫舍，姦淫擄掠，無惡不作，再咁落去香港遲早淪為第二個伊拉克！
講真，南亞兵團食大茶飯，市民早已見怪不怪，前幾日之嘛，兩名來港公幹嘅內地生意人，就喺下榻賓館被強搶二百多萬元，但如果以為身懷巨款至會成為受害目標，咁就大錯特錯喇。尋日朝早元朗輕鐵總站一名清潔女工如常返工，點知突然被一名巴基斯坦大漢從後推落月台，手骨折斷兼下巴聯針，好彩當時冇車埋站，否則後果不堪設想。
光天化日突然畀人推落軌，諗起都令人毛骨悚然，由於港鐵死都唔肯喺輕鐵月台加裝幕門，阿媽以後除咗教仔女「君子不立危牆之下」，仲要加多句「君子不立月台之邊」至得。當然喇，「帶眼識人」亦好緊要，好似涉事嘅呢位巴基斯坦漢咁，據聞經常喺區內醉酒鬧事，係醫院嘅常客，事發時亦係貓貓哋，推完人落路軌後施施然離開不特止，仲喺附近大吵大鬧，以後街坊見到類似人士，記得打醒十二分精神。
其實唔使多講，相信好多市民家陣街頭見到南亞裔人士，街尾就會避之則吉。呢個時候，「假難民之父」以及一眾自命「人權鬥士」之流肯定又會跳出嚟大派「種族歧視」帽子。呢班人講就天下無敵，做就無能為力，南亞兵團犯罪無日無之，沒有最衰，只有更衰，市民平時唔提高警惕，唔通等到中招至call佢哋出嚟幫拖咩？
所以話，呢啲唔係種族歧視，而係小心駛得萬年船。美國政府開口埋口「人人生而平等」，機場出入境安檢咪又係重點招呼特定種族同宗教人士。你有你鬧一竹篙打一船人，特朗普睬你都傻，全力推銷「禁穆令」以及墨西哥邊境「萬里長城」，無他，防患於未然咁解啫。事實上，除咗美國，澳洲對難民同樣施行鐵腕政策，喺境外設立禁閉式難民營，人權組織批評，一於當佢哋唱歌。
當全世界對假難民嚴防死守，惟有香港反其道而行，中門大開，來者不拒，一張行街紙在手，鍾意賴死幾耐都得，同攞正牌犯法冇咩分別，家陣居然發展到推人落路軌，簡直同引入恐怖主義冇乜分別。係人都知，十個難民九個假，但剩低一個「真難民」會唔會中山狼上身，忘恩負義，恩將仇報？今次涉事巴漢手持香港身份證，會唔會就係呢挺「真難民」，大家都好想知道。
都係嗰句，對南亞兵團仁慈，即係對守法良民殘忍。如果話推人落路軌罪大惡極，港府坐視南亞兵團禍港，將七百萬人推落火坑，又該當何罪！