前財政司司長曾俊華(鬍鬚曾)離職後，先後出任香港大學政治學系客席教授，同喺兩間電台「開咪」主持節目兼評論港府，不過竟然冇依例向政府負責審批問責官員離職後就業申請嘅委員會申報，有政府中人炮轟鬍鬚曾係「玩嘢」。鬍鬚曾喺政府任職多年，作為昔日政治問責高官，遵守規例係基本嘅政治道德。就連佢嘅前下屬、財政司司長前政治助理羅永聰都有跟足相關規定，就成立兩間顧問公司向當局申請。鬍鬚曾呢個前上司可謂上樑不正，好彩羅永聰都冇有樣學樣啫。
