政情：激進派DQ晒 泛民拉布收火
立法會隨住社民連梁國雄（長毛）、香港眾志羅冠聰、劉小麗等六人被取消議員資格（DQ），民主派議員當中嘅激進分子幾乎被清除得七七八八，剩番大部分都係傳統溫和泛民。建制派於是趁機修改立法會《議事規則》，加上政府就高鐵提出嘅一地兩檢議案，民主派喺議會發動拉布反擊，仲揚言要拉布拉到明年三月立法會補選。不過，繼上周四首次喺立法會大會拉布拉到流會後，喺前日嘅立法會財務委員會上就收晒火，仲通過咗兩項政府工程撥款。傳統泛民一向唔係拉布中堅分子，唔通今次都虎頭蛇尾？
建制派趁青年新政游蕙禎、梁頌恆、長毛、劉小麗、羅冠聰同姚松炎被DQ，密謀修改《議事規則》杜絕民主派拉布。立法會財務委員會主席陳健波（波哥）更急急推出「主席指示」，意圖禁止民主派喺財委會「玩嘢」，阻礙批出政府撥款。加上政府為咗如期喺本周三（25日）於立法會討論一地兩檢議案，遂於上周立法會大會抽起有關樓市「辣招」嘅印花稅條例草案，民主派即刻發動拉布「宣戰」，不斷要求響鐘點算會議法定人數反擊，牽頭嘅更係一直聲稱唔贊成胡亂拉布嘅民主黨（白鴿黨），而該黨議員許智峯（峯鴿）係最積極要求響鐘點人數嗰個，導致大會流會嘅「最後的鐘」就係出自峯鴿之手。
憂民意反彈 通過財會撥款
而另一邊廂，民主派會議召集人、資訊科技界議員莫乃光、公民黨法律界議員郭榮鏗等九名民主派議員，亦就《議事規則》提出逾卅項修訂，對抗建制派修改《議事規則》。
原以為民主派拉布來勢洶洶，點知前日財委會就收晒火，只係就波哥嘅「主席指引」爭拗咗個多鐘，就回歸審議政府撥款，仲通過咗中九龍幹線及沙嶺墳場建骨灰安置所等工程撥款。據了解，民主派財委會之所以鳴金收兵，係因為佢哋喺首次正式大會一拉布就流咗會，雖然民意未有即時反彈，但傳統溫和泛民都擔心拉布會令市民反感，而且財委會幾個待討論嘅議程，都係民主派唔反對嘅民生項目，喺怕影響市民觀感、造成民意反彈同為三月補選顧全大局之下，幾個傳統泛民政黨都唔敢拉布拉得太盡。
傳統泛民過往同立法會拉布激進派劃清界線，依家激進派議員喺立法會所餘無幾，白鴿黨等先至扮激抵抗建制派。怕就怕佢哋最終都係船頭驚鬼、船尾驚賊，講就口響，實際行動就走晒樣喇。