中環出更：吳克儉退休又去日本睇紅葉
教育局前局長吳克儉向來鍾情去日本賞紅葉，而佢呢個喜好直至退休都冇變，事關久未露臉嘅佢，尋日就喺一個公開場合透露將會喺呢個星期啟程去日本睇紅葉喇！吳克儉話，退休之後多咗時間做運動，又可以同朋友多啲見面，佢嘅旅遊步伐更加未有停低嘅迹象，因為佢趁紅葉季節會去東京、橫濱同埋日光，仲明言睇紅葉係行程之一。
現時日本正受颱風吹襲，不過吳克儉嘅雅興未有受到影響，佢仲話距離出發尚有時間，估計屆時市面已回復正常，而且當地氣溫約十幾度，清涼又夠舒服，呢段時間遊日本係啱啱好，講到成個旅遊達人咁。
蕭偉強調職「家庭事務局局長」
同場仲有已退休嘅勞工及福利局前局長蕭偉強。但佢就話自己唔似退咗休，皆因佢屋企樓上嘅單位喺六月尾爆鹹水管，導致佢屋企水浸兼要裝修，依家佢哋一家仲要暫時搬離屋企。不過，佢就非常樂觀面對事故，話屋企已經十幾年冇裝修，可以趁機作大維修喎，而佢太太更督促佢盡快完成工程，難怪佢大嘆退休生活同返工分別不大，仲講笑話自己其實係調職出任家庭事務局局長啦。
卓妮