中環出更：相機價貴 區詠芷難叫老公古法抽濕
潮流興環保，唔少人都會自備購物袋、去餐廳要求「走飲管」等，不過都唔係個個做得到。環境局局長政治助理區詠芷（Michelle）都話，愈係親近嘅人，向佢哋推廣環保所需嘅時間就愈長。點解Michelle咁感觸，咪因為佢有個攝影發燒友老公，要廿四小時開住電子防潮箱，令心愛器材保持乾爽囉！
立法會議員葛珮帆（EQ）早前舉辦一個有關非洲大象嘅攝影展，Michelle都有出席。講開影相，Michelle話曾經跟老公學攝影，但自己冇乜天分，所以就放棄咗喇。而佢老公叫得做發燒友，屋企咪收埋好多攝影器材？Michelle就話唔止咁樣，啲器材仲要存放喺電子防潮箱內。雖然佢係環境局要員，但都唔敢叫老公轉用較為環保嘅古法抽濕，即膠箱加防潮珠，Michelle仲話︰「佢啲架生咁貴，發咗霉我賠唔起呀！」
講番個攝影展，EQ話當初學攝影係因為愛潛水，好想將海底美景影低同朋友分享，但影嚟影去都影得唔靚，於是就去學攝影。今次展覽主題係EQ嘅另一最愛、即非洲大象。佢一向關注黑市象牙買賣問題，希望藉今次展覽令更多人關注大象被濫殺情況，避免非洲大象喺世上消失。
何厚祥想政府起動物園
沙田區議會主席何厚祥都有到場，佢見到啲大象相就諗番起細個同父母去荔園睇大象「天奴」，佢話依家香港冇動物園，建議政府應該起番個動物園，等市民大眾唔使去外地旅行先可以睇到動物喎。
卓妮