天口開始涼涼哋，又到食大閘蟹嘅季節，可惜內地當局批文遲遲未到，最正宗美味嘅陽澄湖大閘蟹今年分分鐘冇貨賣，家陣又傳出台灣大閘蟹含超標致癌物，對於饕客嚟講，簡直係屋漏偏逢連夜雨。
食安中心係咁講嘅，迄今檢測嘅八十五個大閘蟹樣本中，其中一個嚟自台灣桃園市水產養殖場嘅樣本，二噁英及二噁英樣多氯聯苯超標。不過官僚跟住就大派定心丸，強調有關問題批次並冇流入市面，市民唔使驚喎。
係人都知，二噁英可導致生殖以及發育問題，損害免疫系統，大量攝入更可導致癌症，唔驚就假。官老爺今次拍心口話冇流出市面，到底信唔信得過，真係冇人話得埋。大家應該記得，食安中心舊年驗出江蘇大閘蟹二噁英超標，由化驗到向市民公布，足足花成兩個月時間，至於涉事大閘蟹嘅養殖場所，更加一度諱莫如深。更離譜嘅係，食安中心公布驗蟹結果仲要分兩批公布，等到結果出籠，市民都唔知食咗幾多毒蟹落肚，簡直靠害。
今年內地當局遲遲未批出有關大閘蟹出口批文，唔知係咪同去年呢場安全風波有關，但可以肯定嘅係，「蟹荒」之下，唔少業界轉售台灣、日本等地嘅大閘蟹，結果雜牌大閘蟹充斥市場，魚龍混雜之下，安全風險只會更大，市民一個唔好彩，容乜易病從口入o架。
點講都好，美食事小，健康事大，為咗口腹之欲攞身體嚟較飛，點計都唔值得，食安當局從嚴把關，無可厚非。問題係港產官僚往往踢一踢至郁一郁，行動經常慢幾拍，如果唔係，咩蘇丹紅蛋、孔雀石綠魚、坑渠油等就唔會賣到通街都係。特別係大閘蟹，你知喇，家陣冇咗陽澄湖大閘蟹供應，需求缺口只會更大，為咗加快應市速度，唔排除有不良業者「渾水摸蟹」，坊間一直傳聞有大閘蟹被注射激素以至避孕藥催谷成長，或者食腐肉催肥，食安官僚瞌眼瞓，分分鐘害人不淺。仲有吖，唔該當局健全檢疫及善後制度，唔好次次都手足無措，倒瀉籮蟹，否則市民擔驚受怕之餘，業界又失晒預算，咁就該煨咯。
當然喇，除咗食安官僚，海關都要打醒十二分精神。例如會唔會有人「扮晒蟹」，違反《商品說明條例》，為求利潤及促銷而虛報蟹隻產地來源資料，真係要金睛火眼（目及）到實一實。
始終都係嗰句︰食以安為先。食安官僚「勞苦功高」，市民唔介意犒賞吓你哋，新蟹到港由你哋嘗鮮，冇事冇幹咯喎，市民執二攤又點話吖！