政情：援助佔旺被告 泛民又大細超
高等法院日前就佔旺藐視法庭案裁決，裁定包括黃之鋒、岑敖暉等廿名被告，各一項刑事藐視法庭罪罪成，至於各人需否加監或坐監就押後宣判。由一批民主派人士同學者組成嘅「在囚抗爭者支援基金」尋日發表聲明，指該基金至今籌得約四百二十七萬元，其中四百萬元將繼續用喺支援「雙學三子」案及反東北發展案嘅十三名在囚人士（統稱雙學東北十六子），餘下約二十七萬元則可能會用喺支援佔旺案嘅被告。
準則模糊 援助額不一
四百萬元除以十六等於廿五萬元，即雙學東北十六子每人平均可獲得高達廿五萬元援助，但佔旺案多達廿名被告，每人平均只分得一萬三千多元，有「大細超」之嫌，未知呢個基金係根據乜嘢準則嚟釐定。
其實呢個基金已經唔係首次被指「大細超」，唔少本土派人士早前就質疑，該基金喺籌款時聲言支援本港所有在囚「政治犯」，高調呼籲所有泛民、自決、本土及港獨派人士大團結，結果遊完行、籌完款，基金卻只肯援助屬泛民及自決派的雙學東北十六子，冇幫過因旺角暴亂而被判囚嘅本土派人士，明顯親疏有別。