中環出更：蔣麗芸叫公僕去離島閉關進修

阿Ann尋日出席立法會公務員及資助機構員工事務委員會時話，現時公務員努力工作，並一如傳統按章辦事，但回歸後角色同政治環境轉變，現今嘅公務員需要決策、議政，但就缺乏相關訓練。

促政府幫佢哋置業

佢更藉施政報告中發表嘅公務員學院發揮，認為政府要為公務員提供良好學習環境，建議喺離島或大嶼山嘅澄碧邨畀公務員上課，最好畀公務員逗留幾日，直言要「閂埋門，收埋手機」做研究，與唔同部門合作。

仲記得阿Ann曾透露會督促下屬買磚頭，所以每個下屬都有樓在手，難怪佢會關心公務員置業問題。佢表示識得將近退休嘅高級公務員，手握幾百萬都冇物業，大嘆每個僱主都應該關心下屬，希望佢哋能夠置業，尤其政府作為大僱主喎。

佢仲話高級公務員買唔到一千呎住宅，而低級公務員又排唔到公屋，最終只會被迫去立法會請願。嘩！到時必定好大鑊喎，政府收到未？

卓妮