中環出更：杜振源自己諗橋唔怕畀人跣
創業路係孤獨嘅，卓妮早前見到小母牛香港籌款委員會主席、「快勞夾大王」杜振源（Simon），佢對此就有好深刻嘅體會，仲話創業真係要靠自己。
Simon分享當年最初做生意嘅經歷，指多年前請咗一個內地員工幫手設計產品，個員工用咗足足成年時間咁耐，有日終於諗到個好概念嘅時候就同佢講話要辭職，然後就叫Simon畀錢買番個專利喎。呢個時候Simon都冇晒符，結果咪要畀錢同佢買。
但經一事長一智，從此之後Simon就知道「橋」都係要自己諗，冇得靠人，事關人哋諗到乜就會變咗係人哋嘅資產，依家佢就經常趁一個人嘅時候搵靈感，嚟緊打算由文具市場轉戰小型日用品，好似牙籤咁。佢話好多嘢係一種習慣，由細細個開始用起，所以新一代嘅生活習慣會係佢出發基礎。
三前局長自嘲「舊電池」
呢日小母牛香港舉辦慈善籌款晚宴，包括唔少城中名人獲邀出席，曾獲選雪梨華裔小姐冠軍嘅藍王雲仙都有現身，皆因佢係籌款委員會成員藍國慶嘅太太，同場仲有「翡翠皇后」、善德基金會主席董吳玲玲。見兩位女士好好傾咁，原來藍王雲仙向董吳玲玲請教緊養生之道，話除咗用參嚟泡水飲之外，仲可以就咁將參片放喺口度含或食，聽聞補氣抗衰老喎。唔知係咪因為咁，兩位面色望落都好好。
轉頭見到小母牛香港董事局副主席兼前經濟發展及勞工局局長葉澍堃、財經事務及庫務局前局長陳家強，同埋商務及經濟發展局前局長兼現任港鐵主席馬時亨。點解要重提佢哋嘅舊職位？事關三位合照時自嘲佢哋嘅共通點係三粒「舊電池」，馬時亨同葉澍堃更喺晚宴客串做拍賣官添！
卓妮