政情：有相為證：李慧琼請食蛋糕 泛民唔吼

立法會今個星期復會，議員們嘅工作又再度繁忙。尋日立法會內務委員會主席、民建聯議員李慧琼（Starry）買咗六個大蛋糕，喺內會之後請一眾議員品嘗，諗住大家可以有個輕鬆時間，一齊食吓蛋糕。不過完咗內會，只得建制派議員畀面食蛋糕，而班泛民議員就冇晒影。其實唔止Starry畀泛民請食檸檬，財委會主席陳健波（波哥）亦都一樣。波哥早前推出主席指引，佢打算邀請全體議員出席交流會以收集意見，但尋日限期屆滿時，班泛民議員一係話唔出席，一係完全唔覆。波哥已經講明唔會「癡癡地等」，睇嚟波哥以主席指引剪布勢在必行。