政情：馬紹祥唔打工 開公司搵真銀
前任發展局局長馬紹祥今年七月一日開始離開政府「熱廚房」後，講過會繼續參與香港嘅基建發展工作，並一度傳出佢會加盟香港機場管理局，協助推動三跑工程。三個月過後，原來馬紹祥決定唔再做打工仔，改為自設公司，自己做老細搵真銀。
前任行政長官及政治委任官員離職後工作諮詢委員會尋日公布，馬紹祥將會開設諮詢公司並擔任董事總經理，主打向海外客戶提供商務及投資諮詢服務。
避接同政府有關業務
委員會透露，馬紹祥同佢間新公司，自願避免從事同香港物業項目或特區政府顧問工作有關嘅業務；如果馬紹祥或其公司擬向本地客戶提供服務，佢會另行徵詢委員會嘅意見。馬紹祥識得自己避嫌，以免被指有延後利益或令政府尷尬，佢嘅申請最後梗係獲批喇！