中環出更：「擺烏龍」冇開會 劉慧卿致歉
前立法會議員劉慧卿（卿姐）雖然已經卸下議員身份，但仍然好關心弱勢社群。一直關注外傭權益的卿姐原定尋日出席立法會一個有關規管外傭職業介紹所嘅公聽會，當大家以為卿姐會重返立法會時，點知就見唔到佢現身。原來卿姐一時「擺烏龍」，搞錯公聽會日期，所以未有出席。卿姐特別喺社交網站道歉，確係有錯就要認，其所屬嘅民主黨（白鴿黨）成員真係要好好學習。
盼外傭草案盡快通過
卿姐原定尋日到立法會出席《2017年僱傭（修訂）（第2號）條例草案》委員會公聽會，表達對當局建議修例加強規管外傭職業介紹所，以及完善聘請外傭制度嘅意見。但由於卿姐將該委員會嘅開會日期同下周二開會嘅《2017年僱傭（修訂）條例草案》委員會混淆，所以錯過咗尋日嘅公聽會，只好將意見書交畀立法會秘書處。
卿姐喺社交網站上形容有關條例草案係「千呼萬喚始出來」，關注改善聘用外傭制度嘅人真係「望穿秋水」，佢希望立法會能盡快通過呢條草案，令外傭及僱主唔會墮入無良同險惡職業介紹所嘅陷阱。唔知一眾白鴿黨議員會唔會聽取卿姐意見，畀條例草案盡快通過呢？
卓妮