開講有話，當官不為民作主，不如回家賣紅薯。睇番香港班高官，實心為民嘅少，胡混度日，尸位素餐嘅多，特別係律政司司長袁國強，檢控佔中幕後搞手一味玩拖字訣，居然仲有面霸住個位唔走，真係唔到你唔服！
市民嘅眼睛雪亮，港大最新民調顯示，三位司長民望齊齊下跌，其中袁國強雖然得分比財政司司長波叔高少少，但係支持率淨值跌幅就大幅拋離對方，亦係佢二○一二年上任以來嘅新低，按照呢個趨勢，相信唔使幾耐袁國強可以繼承前朝教育局局長吳得掂「民望低殘王」嘅衣鉢。
當然喇，世上沒有無緣無故的恨。佔領行動喺袁國強任內發生，爛攤子好應該由佢老哥收拾；再講吖，佔領行動黑手誰屬，證據確鑿，路人皆見，部分涉事者亦明言「等拉」，現實卻係包括漢奸黎在內嘅三十九名搞手，至今仍然逍遙法外。特別係漢奸黎，幾乎出錢養起整個反對派，佔領期間周不時傳召各大小頭目密商詭計，自己更赤膊上陣去金鐘現場擺壇，話唔係運動最大金主兼黑手，三歲細路都唔信喇！
好明顯，司法當局畏首畏尾，投鼠忌器，講到尾都係「懼外症」發作，洋奴走狗屁股摸不得，漢奸黎之所以有恃無恐挑機，話「唔怕坐監，淨係怕洗廁所」，就係因為睇穿司法當局底牌，爭在未講「夠膽拉我吖笨」嘅咋！
大家有眼見，無論係佔中抑或旺暴，司法當局拉親嘅幾乎都係魚毛蝦仔，唔少年輕人因為參與暴動而前途盡毀，固然要為自己行為負責，但漢奸黎旗下淫媒咁多年反中亂港，不斷為年輕人洗腦，而「戴妖」之流宣揚「違法達義」歪理，煽動學生上街做政治炮灰，佢哋身為「教唆犯」，理應罪加一等，呢班人一日唔伏法，所謂「司法公義」只係得啖笑。可以斷言，袁國強再唔真正「強」起來，佢嘅民望都咪使旨意止跌回升。
係人都知，社會學有個著名嘅「破窗理論」，一幢大廈出現幾個破窗戶，如果唔即刻修理，好快就會產生縱火等更嚴重嘅破壞行為。同樣道理，律政司遲遲唔敢對佔中始作俑者郁手，處理其他參與者亦係大歎慢板，令人誤以為「法不責眾」甚至「犯法零成本」，有人咪趁勢主張港獨囉，激進分子咪將街頭衝擊文化帶入大學校園，搞到社會永無寧日囉。有人形容對外部勢力嘅走狗仁慈，即係對市民殘忍，真係一啲都冇講錯。
講多無謂，行動最實際。「司法獨立」唔係淨係靠把口吹，要挽回市民對司法嘅信心，唔該坐言起行，速速將以漢奸黎為首嘅禍港蟊賊繩之以法！