政情：旅議會終放人 阿董平安夜正式榮休
香港旅遊業議會總幹事董耀中（阿董）快將退休嘞！阿董原本早於一一年退休，但外聘繼任人臨時「縮沙」唔撈，及後又遇上旅遊業多事之秋，其後又因要「等埋」政府籌組旅監局，結果佢先後三次續任，退休年期押後咗六年，今年旅議會終於放人，阿董已定喺今年十二月廿四平安夜正式榮休，離開工作咗逾廿年嘅旅議會。其職位將由副總幹事陳張樂怡接任，陳張樂怡擔任副總幹事職位廿多年。
未有退休大計
講開又講，原來阿董喺九七年二月十四日情人節當日入職旅議會，做咗逾廿年，今年已六十八歲，按議會規定生日退休，所以佢今年工作至十二月廿三日，廿四日正式退休，當日亦係佢「牛一」嘅大日子，但佢就話未有慶祝計劃，亦未訂下退休大計。
阿董希望市民記得佢處理旅客同旅行社嘅投訴都係持平，維持旅業嘅形象。佢過去處理過唔少棘手問題，例如強迫旅客購物、團友被迫瞓旅巴等等，佢往往企喺最前線，甚至內地媒體亦有採訪佢，佢亦曾到內地旅遊時被人認出，仲話：「乜你都上嚟旅遊呀！」