政情：馬時亨杭州考察 順道為梁國權慶生
港鐵董事局近日到杭州考察兼開會，尋日可謂雙喜臨門，除咗同杭州市地鐵集團簽署意向協議書，計劃成立「港鐵學院杭州分院」之外，亦撞正係港鐵行政總裁梁國權五十七歲「牛一」，仲搞咗個小型生日會添！不過，呢個生日會唔係港鐵主席馬時亨準備嘅，而係杭州市政府送上嘅驚喜，就連港鐵董事局事前都唔知情。
將設分校 冀培訓擴至華東
馬時亨同運輸及房屋局局長陳帆尋日都有出席簽署意向協議書嘅儀式，馬時亨話港鐵多年來積極參與杭州地鐵營運，期望通過今次合作，將培育鐵路專才嘅優質培訓服務，由杭州逐步擴展到華東以至「一帶一路」沿線國家，為提升內地鐵路行業嘅國際競爭力同影響力作出貢獻。
其實，港鐵董事局成員今次杭州之行，亦曾親身視察杭州站，更試玩青年人嘅潮玩，即類似影貼子相嘅智滙屏，感覺新奇又開心。