政情：要求重啟政改 民主阿婆唔熟民情堅離地
有「民主阿婆」之稱嘅前政務司司長陳方安生不甘寂寞，喺施政報告發表前夕又出嚟抽水，指施政報告除咗應重視民生，亦應清晰交代重啟政改事宜，若一日未能正視政改同真普選，一日管治都會有問題。之不過，近日接連有兩個民意調查嘅結果都顯示，市民認為政府最優先需要處理嘅問題，民主政制唔係排尾二就係包尾，反映民主阿婆根本不懂民情、民意，根本係「堅離地」，又再出嚟自暴其醜。
政府今日發表施政報告，民主阿婆尋日出席一個藝術展發布會見記者時又再指指點點，話施政報告要對政改有交代，佢希望施政報告除咗重視一系列嘅民生問題，亦要就重啟政改有個清晰交代，特首可能認為目前並唔係一個適當嘅時間，但一日唔正視政改，唔能夠為香港帶來真普選，一日政府嘅管治都會有問題，所以希望中央能夠早日允許特區政府就呢件事重新諮詢香港市民，務求能夠得到一個各方面都能夠接受嘅方案。
話年輕人身在福中不知福
講到年輕人方面，民主阿婆指某啲年輕人身在福中不知福，但自己亦好了解年輕人今時今日對香港社會嚴重撕裂嘅情況，特別係唔能夠有權去選出特首同全體立法會議員，亦對社會各種唔公平現象感到無奈同投訴無門，政府要正視問題就要對年輕一輩多溝通同多做工夫。
民主阿婆咁強調政改嘅重要，但香港研究協會近日公布的調查結果顯示，受訪市民認為今年施政報告首要優先處理嘅問題係醫療，民主政制就排尾二；而港大民意研究計劃尋日公布有關對施政報告期望嘅調查，發現受訪者認為最需要處理嘅問題係房屋，認為「好需要」或「幾需要」處理政制發展問題，係最少受訪者認為有需要處理嘅項目，兩個調查結果可見，政制根本唔係市民首要重視嘅事。
既然事實係咁，民主阿婆竟然仲不斷誇大政改嘅重要，根本同民情、民意相違，可以話係「堅離地」，明顯係抽錯水，好心佢咪出嚟獻醜喇！