中環出更：嚴徐玉珊好感性 睡前故事講到喊
仁濟醫院董事局早前喺沙田馬場舉行五十周年金禧盃賽，慶祝仁濟醫院成立半世紀，好多董事局成員都帶埋小朋友去支持，主席嚴徐玉珊亦帶埋家人同孫女入場，佢話見到好多總理帶小朋友一齊參與，感覺好熱鬧、好開心，希望仁濟總理們生多啲，仁濟大家庭愈嚟愈大喎。
講起湊小朋友嘅經歷，嚴太話三個仔女都係自己湊大，佢習慣睡前講故事，但係自己好感性，經常講故事講到喊。記得有個古仔係講兩爺孫相依為命，有一日爺爺過咗身，小朋友孤苦無依，講到呢度佢就喊咗出嚟，搞到兩個小朋友望住佢都唔知點算好。
馮卓能堅持周六日陪仔女
副主席馮卓能都有三個小朋友，細仔依家先至歲半。佢話小朋友三歲之前係最好玩嘅時間，你講乜佢就會跟住你講乜，所以佢無論工作幾忙，都會堅持周六、日陪佢哋，有時間都會帶佢哋去旅行，重點係唔做怪獸家長，唔會帶功課去旅行囉！
同場仲有啱啱結婚嘅副主席鄧肇殷，佢話依家睇緊中醫調理身體，積極準備生BB，最重要係每日都要瞓飽。佢話同老公嘅目標一致，想生夠三個，因為雙方都有兄弟姊妹，覺得有伴成長會開心好多，長大後就算父母唔喺身邊，大家都會有個照應。
講番盃賽，結果竟然由嚴太嘅大仔嚴子杰奪得頭馬，嚴太老公、仁濟前主席嚴玉麟開心到飛起，事關仁濟盃舉行咁多年以來，只得兩次由仁濟自己人捧走，第一次就係由佢自己捧走喇！
卓妮