政情：伍凱欣戰東華選區 白鴿黨內憂外患
中西區山頂選區和東華選區補選提名期於本周二（3日）展開。尋日民主黨（白鴿黨）中委伍凱欣率先搶閘報名參選東華選區，該黨前主席劉慧卿、多名現任及前立法會議員亦有現身撐場，但身兼中西區區議員嘅立法會議員許智峯則未有現身。唔少泛民都對該選區有興趣，連黨內亦有人虎視眈眈，是次伍凱欣出戰，或令白鴿黨出現內憂外患情況。
傳協調現分歧 疑非眾望所歸
先講外患，屬泛民陣營嘅中西區規劃及保育街坊聯盟召集人羅雅寧亦有意出戰，近日有傳民主派協調唔成功，伍凱欣和羅雅寧兩人似乎互不退讓，伍凱欣就強調自己係泛民機制下協調出來嘅參選人。
至於內憂，聽聞許智峯支持好友吳兆康太太鍾紹瓊出戰，但最後在支部初選中，由統稱為「區羅柴」的民主黨副主席羅健熙、南區區議員柴文瀚和早前退黨嘅區諾軒所支持嘅伍凱欣勝出，未知許智峯係咪因此而缺席撐場。
另外，伍凱欣過往曾出戰中西區堅摩選區和水街選區，但兩次均失敗，被問到會否擔心再次參選失敗，佢就話每次選舉均「做足功課」，參選經驗可令自己更加堅定喎。