政情：黃國健撐何君堯：我老婆成日都話殺咗我

內委會尋日下午討論由民主派立法會議員毛孟靜（盲毛）提出嘅譴責何君堯議案。盲毛話，言論自由同新聞自由一樣，都係有底線，例如自稱係黑社會就一定係刑事罪行，認為何君堯講出「殺無赦」嘅言論係需要予以譴責。何君堯回應時就話，佢只係對港獨義憤填膺，希望大家唔好扭曲，仲揶揄民主派中文差添！

稱譴責「殺無赦」言論無聊

KK就話，盲毛嘅動議反映立法會依家「好認真咁做好無聊嘅嘢」，又話佢老婆都經常話會殺咗佢，但佢唔認為係真嘅。佢又提到，近日民主派發生民主黨林子健聲稱被擄走、香港中文大學民主牆事件等，都係令泛民尷尬嘅事件，質疑盲毛嘅動議只係想幫民主派轉移視線。KK咁樣擺老婆上枱，唔知返屋企會唔會又被老婆鬧話要殺咗佢呢？

民主派當然唔會放過怒插何君堯嘅機會。教育界議員葉建源就斥責佢散播仇恨同暴力。公民黨郭家麒亦批評，何作為議員及資深律師，其言論令人感到可悲。不過民主黨（白鴿黨）涂謹申就似乎手下留情，只係批評何嘅言論引起社會撕裂，但係咪要根據盲毛動議嘅措辭，禠奪何嘅議員資格，佢就表示有疑問。據了解，白鴿黨之所以留一手，係因為之前譴責議員鄭松泰動議佢哋都唔支持，認為唔應該以「尚方寶劍」去挑埋啲芝麻綠豆事。

「付出好多」 嶺大生停「佔嶺」

立法會喺度煲冇米粥，另一邊廂，嶺南大學學生組織「嶺事館」早前喺校園舉行佔領行動，抗議身兼嶺大校董嘅何君堯「殺無赦」言論，尋日仲舉行論壇，但何君堯缺席，學生就喺一張空櫈上放枯葉，諷刺何君堯早前嘅律師資格風波，笑佢係「執葉律師」。論壇之後，學生就決定結束佔領，原因係同學多日來已付出好多喎。同立法會依家好多爭拗一樣，都係咁冇厘頭。