中環出更：燒豬三兄弟惹笑議員爆發口水戰
下周三立法會大會即將復會，一眾議員尋日聚首舉行切燒豬儀式，未正式開會，眾人已經唇槍舌劍一番。立法會主席梁君彥（Andrew）笑指飲食界立法會議員張宇人（Tommy）同燒豬係「三兄弟」，到佢致詞時就被民主黨議員黃碧雲（一舊雲）窒番轉頭。不過最搞笑都係金融服務界立法會議員張華峯（肥老闆），佢帶埋食物盒嚟食燒豬，被人笑佢「又食又拎」。立法會未開鑼已咁多火花，唔知未來一年會唔會充滿火藥味呢﹖
切燒豬儀式由Andrew主持，佢自備五公斤旅行時買嘅西西里開心果手信畀議員品嘗，話希望大家可以開開心心。燒豬送到時，Tommy亦都到場，Andrew笑指Tommy同兩隻燒豬係「三兄弟」，平時都幾寸嘴嘅Tommy未有還擊，仲行埋去同兩隻燒豬一齊影相，留下「三兄弟」合照。
肥老闆被窒「又食又拎」尷尬
Andrew致詞時話，希望嚟緊一年大家可以暢所欲言，點知被一舊雲打斷話︰「係先好講！」認真招積。影大合照時，出咗名係「重量級」人物嘅肥老闆突然高舉食物盒影相，被一眾議員笑佢又食又拎，肥老闆聽到之後就尷尷尬尬收番埋個盒。肥老闆咁為食，難怪睇落好似又「膨脹」咗喇。
另外，青年新政梁頌恆、游蕙禎、社民連梁國雄、香港眾志羅冠聰、劉小麗及姚松炎六人被取消立法會議員資格，Andrew話，追討游、梁議員薪津一事已委託律師處理，兩人仍未還錢。至於其餘四人追數事宜就仍然研究緊。
卓妮