生物學有所謂嘅返祖現象，即係某啲物種愈活愈倒退咁解。照咁睇，香港政客出名低智甚至反智，就算未至於返祖，都肯定小學雞化，睇吓堂堂立法會議員連五星旗及區旗都公然侮辱咪知囉。
咪睇鄭松泰身兼議員及大學講師咁巴閉，其實心智低B過小學生。呢，去年十月佢老哥喺議事堂將五星旗及區旗倒插，期間一臉洋洋自得，結果求仁得仁被告上法庭，尋日被判「侮辱國旗及區旗」兩罪成立。可惜公義只係彰顯咗一半咋，事關裁判官竟然嚟個反高潮，輕判被告罰款五千蚊咁大把，保住議員資格。喂，立法會議員淨係月薪都近十萬元，咁判法，即係一個月可以侮辱五星旗及區旗足足二十次，與其話係懲罰，不如話係變相鼓勵冇咁嬲。
唔係咩，五星旗及區旗分別代表國家及香港嘅尊嚴，點可以任人肆意侮辱o架，即使係最民主自由嘅地方，國民有啲咁嘅行為都會受到嚴厲譴責，何況鄭松泰既係議員又係教師，對社會有影響力，知法犯法，必須罪加一等，結果竟然被輕輕放下，判罰同控罪最高監禁三年及罰款五萬元相差十萬八千里，有冇再離譜啲吖。咁就難怪鄭議員輸打贏要，好得戚咁話當局檢控無聊喇。
大家有眼見，自從司法叮走六件搞亂檔政客及將雙學三子加監後，明顯放軟手腳，但凡涉及反對派嘅案件無一例外獲輕判，長毛收受黑金獲放生唔在講，前港大學生會會長馮敬恩衝擊校委會亦係輕判社服令咁大把，今次鄭松泰又係咁，有冇咁啱得咁蹺呀？叫人點信司法公平公正呀？再講吖，馮敬恩主動認衰，又係學生，輕判都叫情有可原，之但係鄭松泰有頭有面兼死唔認罪，擺明毫無悔意，誤人子弟，咁都唔使嚴懲，點都講唔通吖。
其實類似一幕大家都見慣見熟咯，好似同樣係公職人員瞞報利益，建制派嘅程介南要坐監，長毛、涂謹申之流毫髮無損；又好似漢奸黎旗下壹淫媒宣賤販淫，案底厚過電話簿，如果當局有法必依，揸正嚟做，一早有人被罰到破產，將牢底坐穿喇，點會容得壹淫媒依家仲喺度反中亂港吖。仲有喎，佔中之亂落幕就嚟三年嘞，漢奸黎至今逍遙法外，律政司一時話「證據太多」，一時話「調查冇時間限制」，總之藉口多多，香港司法獨立評分下跌咪就係咁解囉。
講起就(興)，當局一味姑息養奸，包庇邪惡，犯法成本極低甚至毫無成本，咪一樣係縱容違法歪風。話時話，港府即將要為《國歌法》進行本地立法，又有人話要為二十三條立法，但如果有法不依，立幾多法都係嘥氣嘅咋！