訟棍話「坐監留案底令人生更精彩」，雖然係隨口噏，誰知真係變秘笈！好似「思想家」黃之鋒咁，據其父話「阿仔喺壁屋入面學識打乒乓波」，之前佢運動一向都唔掂，眼呀、手腳唔協調，如今識得抽來又擋去。除了做運動，佢又學識咗做家務，摺被以前都唔識。可見獄中令黃之鋒不但是個「思想家」，也是個「生活家」，好好過壁屋日子，他日出來，面上多了三両肉，飽滿啲睇落冇咁一臉反社會之抗爭戾氣，好事也。
法庭目前正審理包括戴妖在內九名參與佔領行動人士案件，「佔中三丑」之一既陳健民就話其父母仍未能接受佢可能入獄，又估計本學年係佢最後一年在中大任教。陳健民形容過去二十年「將自己拉到好盡」，認為入獄未必是壞事；佢喺法庭與東北案判入獄的黃浩銘交談，知道對方入獄後戒煙，每日跑四公里和閱讀非暴力抗爭書籍。你睇，在香港坐監可以磨練一個人嘅意志，同時野蠻其體魄，更可文明其精神，精彩人生全賴坐監，其意義值得社會學家去深究。
至於前學聯秘書長周永康，在獄中潛心學佛，領悟「孤獨只是內心影子」，覺得或許我們無法改變人生，但至少我們可以改變人生觀；或許我們無法改變風向，但至少我們可以調整風帆。所以話，幾年大學白過了，只知激進勇武，如今一入監獄當堂開竅，知道如何「調適」以達義而不是「違法」去達義，坐監竟如坐禪，令周永康有意外之得。坐監短短幾十日已如得道高僧，點到你唔服？又話晚上同年輕囚友一起收聽電台節目一邊合唱高歌，快樂到不得了！不過，佢唔慣獄中膳食，指啲秋刀魚和鱸魚太腥又熱氣。老朽相信佢學佛尚欠一線，因為當你學佛以後，去到一個修為，應該係睇乜都很順，如今坐監食有魚都嫌腥，一於造反，爭取清蒸野生石斑，令人生更精彩也。