政情：公民講場：電動車加廢紙回收未解決 黃錦星腹背受敵

環境局局長黃錦星最近腹背受敵，先有因內地收緊回收物料進口政策，有香港廢紙出口商警告如未能解決問題，會停收廢紙觸發「廢紙圍城」；及至最近就因電動車充電位被指數目不足，申訴專員公署提出主動調查環境局推廣政策有冇失誤。對於以上兩大難題，黃錦星嘗試撲火，其中香港廢紙出口內地嘅配額問題，有環境局高官北上同國家環境保護部開會，但最終冇提及有冇保證香港獲得多少配額；至於電動車充電位問題，黃錦星死撐唔能夠同外地情況一概而論，睇怕呢兩個問題唔係一時三刻可以圓滿解決，黃錦星仲有一段時間要頭痕嘞！