政情：黃台仰話青政唔玩補選 游蕙禎隔空反駁
因青年新政梁頌恆、游蕙禎等人被取消立法會議員資格，搞到立法會有六個議席出缺，需要進行補選。本土民主前線發言人黃台仰接受傳媒訪問時聲稱，梁頌恆、游蕙禎將唔會參與補選。不過游蕙禎就喺社交網站上發貼文隔空反駁，話對於係咪參加補選仍然喺商討考慮中。
有本土派撐張秀賢
適逢佔領運動三周年，黃台仰同本民前成員李東昇就去英國倫敦出席紀念活動，仲接受傳媒訪問。佢喺訪問中話，除咗梁頌恆、游蕙禎唔會參加補選外，就連青政同本民前都應該唔會派人參選，又話政府會以無所不用其極嘅方法阻止佢哋參選，所以要再參選係妙想天開。佢會傾向支持同時取得泛民及本土派支持嘅候選人，例如已表明有意參加補選嘅前學民思潮發言人、「立言香港」召集人張秀賢。
不過，游蕙禎就反駁話有關補選佢哋仍然喺考慮當中，仲話聽聞有理念相近嘅人希望參選，要持續觀望，「不久的將來便知分曉」。唔知游蕙禎所講嘅理念相近嘅人係邊個呢﹖