政情：爭補選捨難取易撼盟友 姚松炎犯眾憎

白鴿黨派伍凱欣出戰

原本為中西區區議員嘅民建聯蕭嘉怡同自由黨陳浩濂加入政府，分別出任政務司司長政治助理及財經事務及庫務局副局長，令兩人所屬嘅東華同山頂選區需要補選。自由黨過往幾乎一直穩據山頂區，相反東華區議席除咗蕭嘉怡外，向來都係白鴿黨囊中物。有分析就話，蕭嘉怡今次「拋棄」選民，泛民喺補選將有明顯優勢。而對於呢場補選，民主派亦已有協調機制，其中白鴿黨更已決定派伍凱欣出戰。

不過，姚松炎似乎亦想分一杯羹，近日就傳出佢同羅雅寧出嚟爭東華議席，引起民主派內訌傳聞，矛頭更直指姚松炎。據悉，姚松炎原本喺協調機制內，但當時佢就冇出聲要選，到敲定伍凱欣後先至話有興趣，加上之前傳姚松炎將會喺嚟緊嘅立法會補選放棄建制派將力爭番嘅建築界，轉戰直選，變相同民主派爭位。立法會同區議會補選，姚松炎都「捨難取易」，自然神憎鬼厭。

話自己信奉協調制度

本身都係中西區規劃及保育街坊聯盟成員嘅姚松炎就話，其實今次係聯盟想派人參選，佢同羅雅寧都係人選之一。佢哋兩個會一齊擺街站，每次訪問三十至五十名街坊，睇吓街坊支持邊個，再決定聯盟人選。至於聯盟人選會否再同伍凱欣進行初選就唔知喇。姚松炎仲話，自己並冇出席民主派區選協調機制會議，對協調結果並唔知情喎。

對於被指同民主派爭位，姚松炎就強調自己信奉協調制度，又話羅雅寧熟悉社區，連邊度個垃圾桶有咩問題都知，佢自己並冇優勢。至於立法會補選，佢就話並冇拒絕再戰建築界，但點樣安排都要視乎民主派共識，因為作為獨立身份，如果冇民主派支援，就冇足夠財力自行負擔一場地區直選嘅選戰喎。