話咁快就係佔中三周年，一班死唔斷氣嘅支持者尋日去到政總哭喪，佔中黑手亦例牌大講風涼話，可惜場面冷冷清清，同當年不可同日而語，證明大部分市民眼睛雪亮，早就睇穿呢班反中亂港之徒冇好帶挈，仲望佢哋快啲被收監添。
聽吓「佔中三丑」講嘢有幾無恥先喇。「戴妖」戴耀廷話喎，家陣只係民主運動上半場，等一班年輕人刑滿出獄，將來必可感召更多人覺醒，擺明推啲後生仔去死啫；而朱耀明就仲縮骨，竟然話睇報紙至知自己做咗佔中發起人，仲話如果自己被判刑，市民一定會質疑點解要個七十幾歲嘅牧師坐監喎，即係想以宗教身份施壓司法博唔使判刑啫；至於陳健民就話，千祈唔好將旺角暴亂入佢數，有冇再卑鄙啲吖。
咁當然，卑鄙係卑鄙者嘅通行證，為咗逃避法律責任，呢班友乜都做得出。好似佔中總指揮兼金主漢奸黎，家陣急急賣仔套現，就係為咗着草歎世界。睇到喇，呢班友平時滿口仁義道德，實際上講一套做一套，如果違法達義真係咁偉大，坐監真係可以令人生更精彩，點解佢哋唔洗乾淨個八月十五，光明正大入獄呀？點解要千方百計逃避刑責，仲不斷推年輕人落火坑呀？
不過一個巴掌拍唔響嘅，如果唔係律政司一味包庇，班黑手點可以逍遙法外，繼續獻世牙擦擦吖。嗱，世界經濟論壇公布最新嘅全球競爭力報告，香港司法獨立失分最明顯，原因係乜，畫公仔唔使畫出腸喇。難為律政司司長袁國強仲死撐，話呢啲都係主觀睇法喎，客觀事實上睇唔到司法獨立受損，仲話法官專業獨立，會向外國社會解釋香港情況添。其實解釋咪即係掩飾，如果司法真係公平公正，不偏不倚，又點會淨係得魚毛蝦毛被判刑，佔中嘅幕後黑手、金主反而橫行無忌吖。
所以話啫，香港司法獨立備受質疑，唔係無緣無故o架，而係司法一味抓小放大、雙重標準惹的禍。可能心中有鬼啩，袁國強被記者問及幾時至捨得將佔中黑手落鑊，竟然黑面走人拒答，呢啲咪無私顯見私囉。有眼見o架，當局老虎屁股唔敢摸，走狗尾巴唔敢碰，「懼洋症」深入骨髓，檢控冇可能公平公正，香港立立亂就係咁解嘞。
有人就講得啱嘞，遲來嘅公義唔係公義，何況家陣公義唔係遲到，而係缺席，律政司檢控佔中搞手拖拖拉拉，遮遮掩掩，咪就係破壞法治嘅元兇囉。一句到尾，法治係香港最重要嘅核心價值，司法不公係世界上最大嘅不公，律政司繼續徇私枉法，包庇邪惡，香港司法排名下跌，可以話係一國兩制、港人治港失敗嘅徵兆！