曾俊華曾經形容「特首係一份衰工」，但明知「衰工」佢都去博一博，猶幸佢福大命大，份「衰工」冇纏住佢，令佢可繼續過其歎咖啡睇法國電影嘅「中產」生活。老朽忽然舊事重提，皆因有感今之大學校長，唔通都係一份「衰工」？
照常理，在香港做校長，唔好話大學校長，即使幼稚園、小學、中學校長，都好受人尊敬，皆因春風化雨，潤物無聲，偉大到極。而大學校長更具尊崇社會地位，受人景仰，加上香港資助大學嘅校長，其薪酬之高，絕對傲視英、美一流大學。根據一五至一六年的財務報告，各大學列出的最高年薪者薪水，理大約八百二十五萬至八百四十萬元；港大、科大約六百六十萬至六百七十五萬元；中大約六百萬至六百一十萬元；其餘都有三百九十萬至六百六十萬元。總之，大學校長之薪水同世界各地大學比較，一啲都唔失禮。
大學校長既然社會地位崇高，薪水亦優厚，何以咁多大學校長決定唔撈？港大、科大、中大三位校長早已決定明年離任，而理大校長唐偉章日前亦向師生發電郵，話決定明年任期屆滿就退休。理大校長年薪極高，但唐偉章仍然揮一揮衣袖，不再留戀，老朽不禁懷疑「大學校長真係一份衰工」，而且比特首更甚，鬍鬚曾宣之於口而仍然要參選，明知不可為而為之，當知特首唔係真係一份衰工。
當今之大學校園，一個學生會管理嘅「民主牆」，已經搞到校長頭都大埋，而大學已不是研究高深學問的地方，變得烏煙瘴氣，一味播獨成癮；理大管理層話明發現港獨標語「見一張撕一張」，理大的「民主牆」即見「上香區奠唐偉章，抗議校方打壓言論自由」標語。做了近九年校長的唐偉章，看見學生如此野蠻無禮，作為一個機械工程及國際熱傳導的權威，學生連知識也不懂尊重，再呆下去，再高的薪水也是「衰工」。