政情：黃進達家庭旅行帶埋飯煲
有乜嘢可以令從事旅遊業嘅人安定落嚟？家庭相信係其中之一。早幾日喺一個活動上見到香港旅遊業議會主席黃進達（Jason），以前經常因工作四圍飛嘅佢話呢一年少咗去外地，事關佢太太生咗小朋友之後，一家出遊多咗好多嘢要預備，旅行目的地嘅選擇亦都即刻少咗一大截。
有小朋友後 去台灣係極限
Jason話太太以前特別鍾意去韓國旅行Shopping買嘢，但自從生咗小朋友之後，就去唔到太遠嘅地方，因為搭太耐飛機小朋友未必習慣，仲笑言去台灣已經係極限喎。
再加上有小朋友一齊去旅行，除咗衫褲鞋襪帶多咗之外，佢哋仲帶埋個飯煲！事關BB仔好多嘢唔食得，街上食肆食物濃味又多味精，所以太太咪親自煮畀小朋友食囉，咁搞法想去遠啲就惟有等小朋友再大多少少先得嘞！